સુરેન્દ્રનગર જીલ્લામાં આવેલ ધ્રાંગધ્રા નગરપાલિકાની સ્થાનિક સ્વરાજ્યની ચૂંટણી પહેલા જ વોર્ડ નં. ૦૧ માં ભાજપની સંપૂર્ણ પેનલ બિનહરીફ જાહેર થઈ છે.
વોર્ડ નં. ૦૧ માં ભાજપના ઉમેદવારો સામે કોઈપણ રાજકીય પક્ષ કે અપક્ષ ઉમેદવારે ઉમેદવારી નોંધાવવાના અંતિમ દિવસ સુધી ફોર્મ ભર્યું નહોતું. જેના પરિણામે સમગ્ર પેનલ બિનહરીફ જાહેર કરવામાં આવી છે. ચૂંટણી પહેલા જ વોર્ડ નં. ૦૧ના તમામ ચાર ઉમેદવારો બિનહરીફ વિજેતા બન્યા છે. જેમાં હેમાબેન સિંગલ, પ્રિયંકાબા જાડેજા, અમરાભાઈ હાડગડા અને રાજેશ પટેલનો સમાવેશ થાય છે. આ બિનહરીફ જીતને લઈને ભાજપના આગેવાનો અને કાર્યકરોમાં ખુશીનો માહોલ જોવા મળી રહ્યો છે. જયારે બીજી બાજુ વઢવાણ તાલુકા પંચાયતની મેમકા બેઠકના ઉમેદવાર રેખાબેન મકવાણા અને રામપરા બેઠકના ઉમેદવાર કાનજીભાઈ ચાવડા સામે પણ અંતિમ દિવસે કોઈપણ પક્ષના ઉમેદવારોએ ફોર્મ નહી ભરતા તાલુકા પંચાયતની આ બે બેઠકો પણ ચૂંટણી પહેલા જ બિનહરીફ જાહેર થઈ છે.
