સુરેન્દ્રનગર જીલ્લા ભાજપના નમો કમલમ કાર્યાલય ખાતે પાટડી તાલુકાના કોંગ્રેસના આગેવાનો ભાજપમાં જોડાતા સ્થાનિક સ્વરાજ્યની ચૂંટણી પહેલા જ રાજકીય માહોલ ગરમાયો છે અને આગામી ચૂંટણી પહેલા જ કોંગ્રેસને મોટો ફટકો પડ્યો હોય તેવી સ્થિતિ સર્જાઈ છે. આ અંગે મળતી માહિતી મુજબ જીલ્લા કોંગ્રેસના મહામંત્રી તેમજ જીલ્લા પંચાયત સવલાસ બેઠકના કોંગ્રેસના ઉમેદવાર વિક્રમ રબારીએ કોંગ્રેસ સાથે છેડો ફાડી ભાજપમાં જોડાતા પાટડી તાલુકામાં કોંગ્રેસને મોટું નુકશાન થયુ છે. આ ઉપરાંત પાટડી તાલુકા પંચાયતના કોંગ્રેસના ૦૨ ઉમેદવારો તથા પાટડી નગરપાલિકાના કોંગ્રેસના ૦૮ સદસ્યોએ પણ કોંગ્રેસને અલવિદા કહી ભાજપમાં જોડાયા છે. આ મહત્વપૂર્ણ જોડાણથી પાટડી તાલુકામાં કોંગ્રેસમાં મોટું ગાબડું પડ્યું હોવાનું ચર્ચાઈ રહ્યું છે. જ્યારે કોંગ્રેસને છોડનાર આગેવાનોના જણાવ્યા મુજબ તેઓ વર્ષોથી પક્ષ સાથે જોડાયેલા રહી લોક પ્રશ્નો માટે સંઘર્ષ કરતા હતા પરંતુ કોંગ્રેસ પક્ષ તરફથી યોગ્ય પ્રતિસાદ ન મળતા અંતે ભાજપમાં જોડાવાનો નિર્ણય લીધો હતો. તેમજ કોંગ્રેસના આંતરિક વિખવાદને કારણે જૂના અને અનુભવી આગેવાનો ભાજપમાં જોડાઈ રહ્યા હોવાનું પણ સામે આવ્યું છે. જેના કારણે આવનારા સમયમાં કોંગ્રેસને વધુ મોટું નુકશાન પહોંચે તેમ લાગી રહ્યું છે. જીલ્લા ભાજપ પ્રમુખ હાર્દિકભાઈ ટમાલીયા સહિતના આગેવાનો દ્વારા ભાજપનો ખેસ પહેરાવી તમામ નવા જોડાયેલા કાર્યકરોનું સ્વાગત કરવામાં આવ્યું હતું.
