જોરાવરનગર પોલીસે શહેરી વિસ્તારમાં રહેતી યુવતી સાથે બળજબરીપૂર્વક દુષ્કર્મ આચરનાર યુવકને ઝડપી પાડી કાયદેસરની કાર્યવાહી હાથ ધરી છે. જે અંગે મળતી માહિતી મુજબ આરોપી હર્ષવર્ધનસિંહ ઉર્ફે રાવણ ચૌહાણે ચોકલેટના ડબ્બાના ઓર્ડરના બહાને યુવતી સાથે ઓળખાણ કેળવી હતી અને ત્યારબાદ મિત્રતા કરી હતી. બાદમાં યુવતીને ફરવાના બહાને ખમીસાણા રોડ પર આવેલ કેનાલ પાસે લઈ જઈ પરિવારને જાનથી મારી નાખવાની ધમકી આપી કારમાં જ દુષ્કર્મ આચર્યું હોવાનું સામે આવ્યું છે. ઉપરાંત યુવતીની વ્યક્તિગત વિગતો સોશિયલ મીડિયામાં વાયરલ કરવાની તેમજ સગાઈ તોડાવી નાખવાની ધમકીઓ પણ આપી હતી. સમગ્ર મામલે ભોગ બનનાર યુવતીના પરિવારજનોએ જોરાવરનગર પોલીસ મથકે ફરિયાદ નોંધાવતા પોલીસે વધુ તપાસ હાથ ધરી હતી અને પોલીસે ગણતરીના દિવસોમાં જ આરોપી યુવકને ઝડપી પાડી કાયદેસરની કાર્યવાહી હાથ ધરી છે. જયારે આરોપી યુવક કોઈ રાજકીય પક્ષ સાથે જોડાયેલ હોવાની પણ ચર્ચાઓ વહેતી થઈ છે.
