રાજકોટ રેન્જ આઈજી નિર્લિપ્ત રાયની ટીમ દ્વારા રાજકોટ-ચોટીલા હાઈવે પરથી મોટા પ્રમાણમાં ઈંગ્લીશ દારૂ સાથે એક શખ્સને ઝડપી પાડવામાં આવ્યો છે. મળતી માહિતી મુજબ રાજકોટ-ચોટીલા હાઈવે પર જાની વડલા ગામના પાટિયા પાસેથી કપાસિયાની બોરીની આડમાં સંતાડેલ ઈંગ્લીશ દારૂનો જથ્થો ઝડપાયો હતો. પોલીસે કુલ ૧૦,૭૪૦ બોટલો ઈંગ્લીશ દારૂ (કિંમત રૂ. ૧.૨૮ કરોડ) તેમજ ટ્રક સહિત કુલ રૂ. ૧.૪૬ કરોડનો મુદામાલ કબજે કર્યો છે. આ મામલે ટ્રક ચાલક શાહિદ જૂસબભાઈ હિંગોરા (રહે. ભાણવડ) ને ઝડપી પાડી તેની સામે કાયદેસરની કાર્યવાહી હાથ ધરવામાં આવી છે. જ્યારે ઝડપાયેલ ટ્રક ચાલકની વધુ પૂરછપરછ કરતા ઇંગ્લિશ દારૂનો જથ્થો ચનાભાઇ દેવાભાઇ રબારી રહે. રાણપર, (ભાણવડ)વાળા તથા દારૂ ભરેલ ટ્રક સોંપનાર અને દારૂ ભરી આપનારની પણ સંડોવણી બહાર આવી હતી. આથી ઝડપાયેલ ટ્રક ચાલક સહિત હાજર મળી ન આવેલા તમામ શખ્સો વિરુદ્ધ પ્રોહિબિશન એક્ટ હેઠળ ગુનો નોંધી આગળની કાર્યવાહી શરૂ કરવામાં આવી છે. ઉલ્લેખનીય છે કે સ્થાનિક સ્વરાજ્યની ચૂંટણી પહેલા રાજકોટ રેન્જ આઈજીની ટીમ દ્વારા મોટા પ્રમાણમાં ઈંગ્લીશ દારૂ ઝડપી પાડતા સમગ્ર પંથકમાં ચકચાર મચી જવા પામી છે અને સ્થાનિક પોલીસની કામગીરી સામે પણ અનેક સવાલો ઉભા થયા છે. આ સમગ્ર કામગીરીમાં પી.આઈ. આર.એચ.બાર, પીએસઆઇ પી.એન.મોરી, બી.સી.મીયાત્રા, સી.એમ.કાંટેલીયા સહિત સંદિપસિંહ ઝાલા, કાસમભાઈ બ્લોચ, કમલેશભાઈ રબારી, મિતેષભાઈ પટેલ, દિનેશભાઈ ગઢવી, યોગેન્દ્રસિંહ ચુડાસમા, ધર્મેન્દ્રસિંહ વાઘેલા, રાજદિપસિંહ ઝાલા, દિલીપસિંહ સિંધવ, કુલદિપસિંહ ચુડાસમા, નરેન્દ્રસિંહ રાઠોડ, ફતેસંગ પરમાર સહિતનાઓ જોડાયા હતા.