સુરેન્દ્રનગર LCB પોલીસે લખતર તાલુકાના તલસાણા ગામે આવેલ સોલાર પ્લાન્ટમાં થયેલ ચોરીનો ભેદ ઉકેલી બે આરોપીઓને ઝડપી પાડ્યા છે. ઝડપાયેલા આરોપીઓમાં ગુજસીટોકના ગુન્હામાં સંડોવાયેલ આરોપીનો પણ સમાવેશ થાય છે. પોલીસે તેમની પાસેથી કુલ રૂ.5.30 લાખનો મુદ્દામાલ કબજે કર્યો છે. જે અંગે મળતી માહિતી મુજબ તલસાણા ગામે આવેલ સોલાર પ્લાન્ટમાં થોડા સમય પહેલા ચોરીની ઘટના બની હતી. આ અંગે લખતર પોલીસ મથકે ફરિયાદ નોંધાતા તપાસ શરૂ કરવામાં આવી હતી. બનાવની ગંભીરતાને ધ્યાનમાં રાખી LCB ટીમ પણ તપાસમાં જોડાઈ હતી. LCB પોલીસે હ્યુમન સોર્સ, ટેક્નિકલ સોર્સ તેમજ સીસીટીવી ફૂટેજના આધારે ઝમર ગામ પાસે વોચ ગોઠવી હતી. દરમિયાન બે શખ્સોને ઝડપી પાડવામાં આવ્યા હતા. ઝડપાયેલા આરોપીઓના નામ : (૧) રોમીઝખાન મહોમદખાન મલેક, રહે. ગેડીયા હાલ સુરેન્દ્રનગર. (૨) અતીકભાઈ ધરમશીભાઈ ચાણશમા, રહે. સુરેન્દ્રનગર. પોલીસે આરોપીઓ પાસેથી 17 તાંબાની પ્લેટો, 140 કિલો તાંબાનો વાયર, એક આઈશર વાહન, એક બાઈક તેમજ બે મોબાઈલ મળી કુલ રૂ.5.30 લાખનો મુદ્દામાલ કબજે કર્યો હતો. જ્યારે તપાસ દરમિયાન બહાર આવ્યું હતું કે આરોપી રોમીઝખાન મલેક વિરુદ્ધ ધ્રાંગધ્રા, બગોદરા, બજાણા, હળવદ, સાણંદ, વિરમગામ, લખતર સહિતના અનેક પોલીસ મથકોમાં વિવિધ ગુન્હાઓ નોંધાયેલા છે. આ ચોરીના ગુન્હામાં સંડોવાયેલ અન્ય આરોપી રાહુલ ધરમશીભાઈ ચાણશમાને ઝડપી પાડવા પોલીસે વધુ તપાસ હાથ ધરી છે.
-Viren Dangrecha.
