સુરેન્દ્રનગર મહાનગરપાલિકાની ચૂંટણીમાં વોર્ડ નં.૦૮માં સાસુ અને પુત્રવધુ વચ્ચે સામ સામે જંગ જામશે

સુરેન્દ્રનગર મહાનગરપાલિકાની આગામી ચૂંટણીમાં વોર્ડ નંબર ૦૮માં અનોખો રાજકીય જંગ જામશે તેમ લાગી રહ્યું છે. જેમાં એક જ પરિવારની સાસુ અને પુત્રવધુ આમને સામને ચૂંટણી મેદાનમાં ઉતરતા સ્થાનિક રાજકારણમાં ગરમાવો વ્યાપી ગયો છે. જેમાં સુરેન્દ્રનગર મહાનગરપાલિકાની આગામી ચુંટણી માટે વોર્ડ નંબર ૦૮માં થી પુત્રવધુ હીનાબેન થરેશાને ભાજપ દ્વારા ટિકિટ આપવામાં આવી છે જ્યારે બીજી બાજુ સાસુ રેખાબેન થરેશાએ આમ આદમી પાર્ટીમાંથી ફોર્મ ભર્યું છે. આમ એક જ વોર્ડમાં પરિવારજનો વચ્ચે સીધી ટક્કર બનતા મતદારો પણ મૂંઝવણમાં મુકાયા છે કે સાસુને મત આપવો કે પુત્રવધુને ? પરંતુ ચુંટણી પરિણામને દિવસે સ્પષ્ટ થઈ જશે કે કોની જીત થાય છે અને કોને હારનો સામનો કરવો પડે છે. હાલ તો બંને ઉમેદવારોએ ફોર્મ ભર્યા બાદ પોતાની જીતનો વિશ્વાસ વ્યક્ત કર્યો હતો. આ અનોખા ચૂંટણી જંગને કારણે વોર્ડ નંબર ૦૮માં ચૂંટણી પ્રચાર વધુ રસપ્રદ બનશે તેમ લાગી રહ્યું છે.