રાજકોટ રેન્જ IG નિર્લિપ્ત રાયની ટીમે ચોટીલા તાલુકામાંથી ઈંગ્લીશ દારૂ સાથે 03 શખ્સોને ઝડપી લીધા

અમદાવાદ-રાજકોટ નેશનલ હાઈવે પર થી મોટા પ્રમાણમાં ઈંગ્લીશ દારૂની હેરાફેરી અને કટીંગ થતું હોવાની ફરીયાદો ઉઠવા પામી છે. જેને ધ્યાને લઈને રાજકોટ રેન્જ આઈજી નિર્લિપ્ત રાયની સ્પે.ટીમે પેટ્રોલિંગ હાથ ધર્યું હતું. જેમાં બાતમીના આધારે ચોટીલા હાઇવે પર પિયાવા ગામ પાસે થી શંકાસ્પદ હાલતમાં એક કાર પસાર થતા તેને રોકી તલાશી લેતા તેમાંથી ઈંગ્લીશ દારૂ સહિતનો મુદામાલ કબજે કર્યો હતો અને કારમાં સવાર એક મહિલા સહિત ત્રણ શખ્સો (૧) સોહનલાલ ગણેશરામ પરમાર (૨) કૃણાલ સોહનલાલ પરમાર અને (૩) રેખાબેન સોહનલાલ પરમાર, તમામ રહે.સુરત વાળાને ઝડપી પાડ્યા હતા તેમજ કારમાંથી અલગ અલગ બ્રાન્ડની ઈંગ્લીશ દારૂની બોટલો નંગ ૨૧૧ કિંમત રૂ.૪૬,૨૪૫ અને કાર સહિત ફૂલ રૂ.૩,૨૫,૨૪૨ મુદ્દામાલ કબજે કર્યો હતો. પોલીસની નજરથી બચવા તેમજ ગુમરાહ કરવા પરિવાર સાથે કારમાં બેસી ઈંગ્લીશ દારૂની હેરાફેરી થતી હોવાનું બહાર આવતા ખુદ પોલીસ પણ ચોકી ઉઠી હતી. તેમજ વધુ પૂરછપરછ દરમિયાન ઇંગ્લિશ દારૂનો જથ્થો રાજસ્થાન રહેતા હરીશ મેવાડાએ ભરી આપ્યો હોવાનું અને ગોંડલ રહેતા વિશાલ એ મંગાવ્યો હોવાનું બહાર આવ્યું હતું. આથી ઝડપાયેલ ત્રણ શખ્સો સહિત ફૂલ ૦૫ વ્યક્તિ સામે ચોટીલા પોલીસ મથકે પ્રોહીબિશન એક્ટ હેઠળ ગુન્હો નોંધી કાયદેસરની કાર્યવાહી હાથ ધરી છે. જ્યારે સ્થાનિક પોલીસને અંધારામાં રાખી રેન્જ આઈજીની ટીમ દ્વારા ઈંગ્લીશ દારૂ ઝડપી પાડતા અનેક ચર્ચાઓ પણ વહેતી થઈ છે. આ કામગીરીમાં પીઆઈ અપૂર્વ પટેલ, પીએસઆઈ પી.એન.મોરી, બી.સી.મિયાત્રા, સી.એમ. કાંટેલીયા સહિતનો સ્ટાફ જોડાયો હતો.