લીંબડી તા.પંચાયતના પુર્વ પ્રમુખ કૃષ્ણસિંહ રાણાને પક્ષ વિરોધી પ્રવૃતિ કરવા બદલ જીલ્લા ભાજપ દ્વારા સસ્પેન્ડ કરાયા

લીંબડી તાલુકા પંચાયતના પૂર્વ પ્રમુખ વિરુદ્ધ પક્ષ વિરોધી પ્રવૃત્તિઓના આક્ષેપોને લઈ જીલ્લા ભાજપ દ્વારા કડક કાર્યવાહી હાથ ધરવામાં આવી છે. સ્થાનિક સ્વરાજ્યની ચૂંટણી દરમિયાન પાર્ટીની લાઇનથી વિખૂટા જઈ અન્ય પક્ષના ઉમેદવારોના પ્રચારમાં જોડાયેલા હોવાના કારણે આ નિર્ણય લેવામાં આવ્યો હોવાનું જાણવા મળે છે. જે અંગે મળતી માહિતી મુજબ જીલ્લા ભાજપ દ્વારા લીંબડી તાલુકા પંચાયતના પૂર્વ પ્રમુખ કૃષ્ણસિંહ છત્રસિંહ રાણાને પાર્ટીના તમામ હોદ્દાઓ પરથી ૦૬ વર્ષ માટે સસ્પેન્ડ કરવામાં આવ્યા છે. આ કાર્યવાહી થી જીલ્લાના રાજકારણમાં ચકચાર મચી ગઈ છે અને ચૂંટણી પૂર્વે જ આંતરિક મતભેદો સામે આવ્યા છે. જ્યારે આ મુદ્દે શિયાણી જીલ્લા પંચાયત બેઠકના ભાજપ ઉમેદવાર ભગીરથસિંહ રાણાએ પણ જિલ્લા ભાજપ પ્રમુખ તેમજ સ્થાનિક ધારાસભ્ય કિરીટસિંહ રાણા સમક્ષ રજૂઆત કરી હતી. જો કે ચૂંટણી પહેલા જ પક્ષ દ્વારા આવા કડક પગલાં લેવામાં આવતા રાજકીય વાતાવરણમાં ગરમાવો વ્યાપી ગયો છે.જે મામલે લીંબડી તાલુકા પંચાયતના પૂર્વ પ્રમુખ કૃષ્ણસિંહ રાણાએ ભાજપ પક્ષની કામગીરીમાંથી પોતાને મુક્ત કરવાની માંગ અગાઉ કરી હોવાનું અને પોતાના પર લગાવાયેલા પક્ષ વિરોધી પ્રવૃત્તિઓના આક્ષેપોને નકારી કાઢતા જણાવ્યું હતું કે આ આક્ષેપો સંપૂર્ણપણે ખોટા અને પાયા વિહોણા છે. તેમજ તેઓ છેલ્લા ૩૦ વર્ષથી ભાજપ સાથે સક્રિય રીતે જોડાયેલા છે અને ૧૫ વર્ષ સુધી તાલુકા પંચાયતમાં સતત વિજેતા બની સેવાઓ આપી છે. તેમણે વધુમાં ઉમેર્યું કે તેઓ હાલમાં ખાનગી કોન્ટ્રાકટર તરીકે કામગીરી કરી રહ્યા છે, તેમજ અમદાવાદ ખાતે તેમની ફેક્ટરી છે અને વિવિધ સામાજીક તથા સેવાકીય સંસ્થાઓમાં માનદ સેવા આપી રહ્યા છે. આથી સામાજીક અને સેવાકીય પ્રવૃત્તિઓમાં વ્યસ્તતા વધુ હોવાથી આગામી ૦૬ મહિના સુધી પક્ષની કામગીરીમાંથી મુક્તિ આપવા માટે તેમણે ભાજપ પાસે લેખીત રજૂઆત કરી છે.